Kəramət Böyükçöl
Azərbaycan ədəbiyyatının ən qalmaqallı simalarından biri. Yazıçı, publisist, bəzən də özünü heç bir qəlibə sığdırmayan bir söz adamı kimi təqdim edən Böyükçöl 17 oktyabr 1987-ci ildə İmişlinin Əliqulular kəndində dünyaya gəlib. Səbail rayonu 51 saylı orta məktəbdə təhsil alıb, daha sonra Bakı Dövlət Universitetinin Filologiya fakültəsini bitirib. Onu geniş ictimaiyyət ilk dəfə ANS TV-də səsləndirdiyi erotik şeirlə tanıdı. Bu cəsarətli çıxış onun adını gündəmə gətirdi və Böyükçölə "ədəbi provokator" imici qazandırdı. 2010-cu ildə Azərbaycan Yazıçılar Birliyinə üzv oldu, amma çox keçmədən – 2015-ci ildə sərt tənqidlərinə görə ordan uzaqlaşdırıldı. Sərt mövqeyi, açıq danışığı və qeyri-ənənəvi üslubu ilə tanınan Böyükçöl 2020-ci ildə sosial şəbəkələrdə hökuməti və bəzi tanınmış simaları sərt tənqid etdiyi canlı yayımın ardından polis tərəfindən saxlanıldı. Hadisə rezonans doğurdu, Böyükçöl bir gün sonra sərbəst buraxıldı və məcburi tibbi müalicəyə cəlb olundu. 2021-ci ildə sağlamlıq problemləri səbəbindən təkrar xəstəxanaya yerləşdirildi və üç həftə sonra müalicəsini tamamlayaraq çıxdı. Ədəbi yaradıcılığına gəldikdə, Kəramət Böyükçöl fərqli üslubu ilə seçilir. "Çöl", "Səkkizinci gün", "Məni kim tapa bilər?", "Əlqəmə", "Elçibəyin sirri", "Səs", "Fərarinin həyat sevgisi" və "Pozğun" kimi kitabları ilə oxuculara tanışdır. Son illərdə o, həm yazıçılıq, həm publisistika, həm də kitab satışı ilə məşğuldur. Uzun müddət səyyar kitab satıcısı kimi fəaliyyət göstərdikdən sonra 2024-cü ilin yanvarında öz kitab mağazası – *Kerazon*un açılışını etdi. Hələ də Azərbaycan Yazıçılar Birliyini və onun üzvlərini tənqid edir, mövqeyindən geri çəkilmir. Onun ədəbiyyata, cəmiyyətə və həyata baxışı, şübhəsiz ki, mübahisəli olsa da, Kəramət Böyükçöl çağdaş Azərbaycan ədəbiyyatında müzakirə olunan, diqqət çəkən və unudulmayan simalardan biridir.
Doğum Tarixi: 17 oktyabr 1987
Doğum Yeri: Əliqullar, İmişli rayonu
Valideynləri: Qəşəm Nəcəfzadə